నవ్వింది నా చెలి

వెండి మబ్బుల్లో
నిండు చందమామలా
చలి కాలంలో సూర్యుని
వెచ్చదనంలా
తెల్లని లిల్లి పూల
గుబాళింపు
చక్కని సాయంత్రం విరిసిన
హరివిల్లు
చీకటి సమయంలో చుక్కల
మిణుకు
సెలయేరులో పారే
మంచి నీరు
గుండెకు హాయినిచ్చే
చల్ల గాలి
వర్షం కురిసే వేళ
పులకరింపు
పచ్చని చిలకల
పలకరింపు
రాగయుక్తంగా సాగే
మంత్రోచ్చారణ
పండగ వేళలో మేళవించే
సంతోషం అనురాగం
గాత్ర సంగీతాల్లో
రాగం
సంక్రాంతి ముగ్గులో
రంగు
ఉరికే జింకలలో
ఉత్సాహం
చినుకు తాకిన చెట్టులో
పచ్చదనం
నెమలి పించంలో
మెరుగు
ఏకాంత వేళలో
గుండె చప్పుడు
అలసిన కనులకు
హాయినిచ్చే ఆకాశం
నీటి చుక్కగా రాలిన
స్వాతి ముత్యం
గిర్రున తిరిగే
విష్ణు చక్రం
దేవుడికి చేసే
అభిషేకం
వసంత కోకిల
కూ హూ రావం
చిలికిన మజ్జిగలో
నవనీతం
మంచి పుస్తకం లో
జ్ఞానం
ధ్యానం లో పొందే
ప్రశాంతం
తలపై శతగోపంతో
ఆశీర్వాదం
చిన్న పిల్లల
అమాయకత్వం
పెద్ద పిల్లల
చిలిపితనం ... . .లా
అలా, ఇలా ....
ఏదోలా ....
అందం కంటే అందమైన
అందంగా, ఆనందంగా
నవ్వింది నా చెలి
నవ్వింది నా చెలి
నవ్వింది నా చెలి
నవ్వింది నా చెలి